१२ कात्तिक, मुस्ताङ। आज बिहानैदेखि भएको भारी हिमपातका कारण चराङ–लोमान्थाङ सडकमा सवारी आवागमनमा समस्या उत्पन्न भएको छ ।

चराङ–लोमान्थाङ खण्डको नेपाली सेनाको ब्यारेक रहेको थुर्लुङफाँटदेखि लोमान्थाङसम्मको पाँच किलोमिटर सडकमा हिमपातका कारण सवारी आवागमनमा कठिनाइ भएको प्रहरी नायब उपरीक्षक छिरिङ किप्पा लामाले जानकारी दिए । ‘चराङ–लोमान्थाङ सडकमा उक्त सडकमा आठ इञ्चसम्म हिउँ जमेकाले आवागमन असहज भएको छ‘, प्रहरी नायब उपरीक्षक लामाले भने । उनका अनुसार यो हिमपात ३ वर्षपछि भएको हो। यसअघि हिमपात भएको थिएन। 

मङ्गलबार लोमान्थाङ–२ न्हेचुङस्थित सशस्त्र प्रहरी बोर्डर आउटपोस्ट बिओपीका सुरक्षाकर्मीहरुले छोसेर–कोरला सडकमा जमेको हिउँ पन्छ्याएका थिए । यसैगरी हिमपातका कारण असहज बनेको कागबेनी–मुक्तिनाथ सडक हाल सञ्चालन भएको उनले बताए ।

मुक्तिनाथ जाने आन्तरिक तथा बाह्य पर्यटकहरूको घुइँचो लागेको छ । कागबेनीदेखि मुक्तिनाथसम्मै हिमपात भइरहेको छ। मुक्तिनाथ दर्शन गर्न जाँदा हिडेर जान नसक्‍ने तीर्थयात्रीहरूलाई आधाबाटो घोडाको सुविधा उपलब्ध छ भने सक्नेहरू आफै हिड्दै भर्‍याङ चढेर जाने गरेका छन् ।

मङ्गलबार दिनभर परेको हिमपातका कारण उपल्लो मुस्ताङदेखि तल्लो मुस्ताङसम्मका डाँडाकाँडा हिउँले सेताम्मे छन् ।

मङ्गलबार उपल्लो मुस्ताङको घमीदेखि कोरलासम्म र मुक्तिनाथ क्षेत्रमा भारी हिमपात भएको थियो । भारी हिमपातका कारण स्थानीय जनजीवन प्रभावित भएको छ

 तस्वीरहरू : सुशीलबाबु थकाली/मुस्ताङ